Enginn ráðherra ætlar að funda með Dalai Lama

Fjármálaráðherra segir að engin samræmd stefna hafi verið mörkuð varðandi það hvort ráðherrar í ríkisstjórn Íslands fundi með Dalai Lama meðan á heimsókn hans á Íslandi standi. Hverjum ráðherra sé í sjálfsvald sett hvort hann vilji hitta hinn útlæg trúarleiðtoga Tíbeta. Enginn ráðherra hefur óskað eftir fundi með honum.

Dalai Lama, andlegur leiðtogi Tíbeta, hefur verið í útlegð í hálfa öld. Hann kemur til Íslands rétt fyrir klukkan níu í kvöld frá Kaupmannahöfn þar sem heimsókn hans hefur valdið deilum sökum harkalegra viðbragða Kínverja við fundi hans með Lars Lökke Rasmussen forsætisráðherra og Per Stig Möller utanríkisráðherra á föstudaginn. Kínverjar hafa sagt fundinn grafa undan góðu vinasambandi þjóðanna. Kínverjar andmæla öllum fundum tíbetska trúarleiðtogans með fulltrúum erlendra stjórnvalda sökum þess að stefna Dalai Lama sé að skilja Tíbet frá Kína.

Lökke Rasmussen sagðist aðeins hafa gert það sama og fyrriennari hans Anders Fogh Rasmussen sem fundaði með Dalai Lama í Danmörku 2003. Stjórnarandstaðan í Danaveldi tekur undir með forsætisráðherranum.

„Við berum mikla virðingu fyrir Kína. Engu að síður tel ég að Kína þurfi líka að bera mikla virðingu fyrir Danmörku. Í Danmörku viljum við hitta fólk og tala við fólk. Í stað þess að senda reiðibréf til ríkisstjórnar Danmerkur tel ég að Kínverjarnir ættu kannski sjálfir að funda með Dalai Lama," segir Helle Thorning Schmidt, formaður Jafnaðarmanna.

Hér á Íslandi virðist enginn ráðherra ætla að hitta Dalai Lama og ekki heldur forsetinn sem er erlendis á Smáþjóðaleikunum. Trúarleiðtoginn kemur reyndar til fundar við utanríkismálanefnd í Alþingishúsinu á þriðjudaginn og þá tekur Ásta Ragnheiður Jóhannesdóttir, forseti Alþingis, á móti henni.

Fréttastofa reyndi í dag að ná tali af öllum ráðherrum í ríkisstjórninni til að fá svör við því hvort þeir ætluðu að hitta Dalai Lama og ef ekki af hverju.

Steingrímur J. Sigfússon, fjármálaráðherra og formaður vinstri grænna, var á ferð úti á landi og sagði það ekki hafa komið til tals að hitta hann. Ríkisstjórnin væri ekki með samræmda stefnu í málinu og hverjum ráðherra í sjálfs vald sett hvort hann vilji hitta hann.

Aðrir ráðherrar sem náðist í sögðust ekki hafa uppi áform um að hitta hann og að það hefði ekki komið til tals. Katrín Jakobsdóttir, menntamálaráðherra, sagðist þó ætla á fyrirlestur Dalai Lama á þriðjudaginn.

Ekki náðist í forsætisráðherra eða utanríkisráðherra vegna málsins þrátt fyrir ítrekaðar tilraunir.