Ráðherrabílarnir kosta álíka mikið og sjúkraflutningar í Árnessýslu

Bílafloti ríkisstjórnarinnar kostar ríkissjóð álíka mikið og allir sjúkraflutningar í Árnessýslu. Skera þarf niður í sjúkraflutningum í því umdæmi á næsta ári og fækka á sjúkraflutningamönnum um fjórðung. Með því fást 17 milljónir sem duga til að reka tvo ráðherrabíla.

Það vakti ekki litla athygli þegar Jóhanna Sigurðardóttir settist í ríkisstjórn árið 1988 og afþakkaði ráðherrabíl og einkabílstjóra og keyrði um á sínum eigin Mithusbishi Lancer. En nú 20 árum eldri notar Jóhanna forsætisráðherra ráðherrabíl og bílstjóra eins og ríkisstjórnin öll.

Þótt fyrirkomi að ráðherrar mæti á hjólhesti í vinnuna hafa ráðuneytinu það sem af er ári varið á bilinu sex til tíu milljónum króna í bílaflotann. Bíll viðskiptaráðherra hefur verið ódýrastur í rekstri, 6,2 milljónir, en um þriðjungi meira hefur farið í bílinn undir heilbrigðisráðherra, 9,7 milljónir. Tvö ráðuneyti kusu að gefa ekki upp laun bílstjóra sinna, við áætlum laun þeirra og samanlagt má því ætla að bílafloti ráðuneytanna hafi kostað ríkissjóð á þessu ári rétt tæpar 90 milljónir króna.

Þótt 90 milljónir séu vissulega dropi í hafið í ríkisfjármálunum, þá er hann enginn dropi að mati sjúkraflutningamanna á Suðurlandi. Spara þarf 17 milljónir á næsta ári. Í dag eru menn í sextán stöðugildum að manna sjúkraflutninga á þessu svæði, þeim verður fækkað í 12. Sjúkraflutningum á svæðinu hefur þó fjölgað um rúman helming síðustu fjögur ár. Útköllin voru í fyrra tæplega fimm að meðaltali á sólarhring.

„Í gegnum sýsluna liggur einn hættulegasti vegakafli landsins. Við erum með 13 þúsund sumarhús í eigu einstaklinga og félagssamtaka og maður spyr sig hvort verið sé að setja verðmiða á mannslíf með þessari skerðingu," segir Jóhann K. Jóhannsson, formaður Félags sjúkraflutningamanna á Suðurlandi.

Með niðurskurði yrði aðeins hægt að manna einn bíl frá tíu á kvöldin til tíu á morgnana, segja þeir og finnst óásættanlegt. Og þeir eru ekki sáttir við hve mikið skattfé fer í ráðherrabíla og bílstjóra þeirra.

„Mér finnst það vera skuggalega nálægt því sem það kostar að halda úti 16 sjúkraflutningamönnum í Árnessýslu," segir Einar Örn Arnarsson, sjúkraflutningamaður.

Rétt er að taka fram að laun 12 ráðherrabílstjóra er inni í kostnaði ráðuneytanna.