Bréfdúfa fljótari en tölvupóstur

Netsamband er svo lélegt í Suður-Afríku að upplýsingatæknifyrirtæki nokkru í Jóhannesarborg hefur tekist að sýna fram á að það er fljótlegra að senda gögn með bréfdúfu en tölvupósti. Fyrirtækið sendi dúfuna 80 kílómetra leið með rafrænan gagnalykil festan við fótinn. Sömu gögn voru svo send með tölvupósti sömu vegalengd og tók það tvær klukkustundir og tæpar þrjár mínútur. Dúfan kom gögnunum hins vegar til skila á einni klukkustund og átta mínútum. Auk þess hve netsamband er lélegt í Suður-Afríku er netþjónusta þar rándýr.