Síminn gefur Hjartaheill ágóða vegna söfnunar

Síminn hefur ákveðið að gefa Hjartaheill allan sinn ágóða af símasöfnun samtakanna á laugardag. Síminn tók 79 krónur fyrir hvert símtal í 900 númer og samkvæmt því sem Vísir kemst næst nemur upphæðin rúmri milljón.

Margrét Stefánsdóttir, upplýsingafulltrúi Símans, sagði í samtali við Vísi að fyrirtækinu væri ljúft að verða við bón Hjartaheilla um að gefa eftir þennan kostnað. „Við höfum alltaf lagt okkur fram um að eiga sem best samskipti við góðgerðar- og líknarfélög. Síminn hefur áður gefið eftir kostnað í söfnunum á borð við þessa ef eftir því hefur verið leitað," segir Margrét.

Skorað var á Símann í beinni útsendingu á Stöð 2 á laugardaginn að gefa eftir ágóða sinn og sagði Margrét að það væri í samræmi við stefnu fyrirtækisins.