Stal peningum úr gjaldkerakassa í tvígang

Viðskiptavinur Íslandsbanka í Vestmannaeyjum hefur verið kærður fyrir að stela í tvígang peningum úr kassa gjaldkera. Fyrra brotið komst ekki upp fyrr en einstaklingurinn endurtók leikinn, þremur mánuðum síðar.

Sem fyrr segir er um að ræða tvo þjófnaði, annars vegar frá 20. maí sl. og hins vegar frá 14. ágúst sl. Að sögn lögreglunnar í Vestmannaeyjum áttuðu starfsmenn bankans sig á því að eitthvað væri ekki með felldu þegar uppgjör dagsins 14. ágúst stemmdi ekki. Upptökur úr eftirlitsmyndavélum voru því skoðaðar og sást þá til aðila taka peninga úr kassa gjaldkera.

Í kjölfarið voru eldri upptökur eftirlitsmyndavéla skoðaðar og kom þá í ljós að sami aðili hafði brotið af sér, með sama hætti tæpum þremur mánuðum áður. Viðkomandi hefur viðurkennt þjófnaðinn og skilað þeim peningum sem hann tók ófrjálsri hendi, en um er að ræða alls 180 þúsund krónur. Málið telst upplýst að sögn lögreglu.

Að sögn Más Mássonar, forstöðumanns samskiptasviðs Íslandsbanka, er verið að endurskoða verkferla til að koma í veg fyrir að atvik sem þetta endurtaki sig.