Sævar vill 1. sætið í Suðurkjördæmi

Sævar Ciesielski, sem fékk þyngsta dóminn í Geirfinnsmálinu svokallaða, hefur ákveðið að gefa kost á sér í fyrsta sæti Framsóknarflokksins í Suðurkjördæmi. Flokkurinn fékk tvo þingmenn kjörna í kjördæminu fyrir tveimur árum.

Sævar ólst upp á bænum Stóra Hofi í Árnessýslu og segist hafa kunnað ákaflega vel við sig í sveitinni. „Ég talaði við Guðna Ágústsson í gær og hann tók vel í þetta," segir Sævar og bætir við að afi sinni hafi verið stuðningsmaður Ágústs Þorvaldssonar pabba Guðna. Ágúst sat á þingi fyrir Framsóknarflokkinn á árunum 1956 til 1974. „Afi barðist fyrir því að Ágúst kæmist á þing því íhaldspakkið var ekki að gera neitt fyrir sveitunga sína."

„Ég hef alltaf talað fyrir því að standa verði vörð um réttindi þeirra sem minnst mega sín og þeirra sem erfa munu landið," segir Sævar aðspurður um stefnumál sín. Honum er einnig umhugað um námsmenn og sér í lagi þá sem staddir eru erlendis. „Hvers vegna að íþyngja námsmönnum þegar það voru 30 einstaklingar sem settu landið á hausinn?"

Sævar er sannfærður um að Framsóknarflokkurinn muni leiða hið nýja afl sem breyta mun Íslandi.