Þjóðarkosningu um Icesave hrint af stað

Vefmiðillinn Eyjan mun í dag hleypa af stokkunum rafrænni þjóðarkosningu á meðal almennings um hvort veita skuli ríkisábyrgð á Icesave-samkomulaginu.

Um er að ræða kosningu sem fram mun fara á netinu dagana 13. til 17. desember. Eyjan segir að um sé að ræða fyrstu öruggu rafrænu atkvæðagreiðsluna hér á landi sem allir íslenskir kjósendur geti tekið þátt í.

Notast er við kerfið Íslendingaval þróað af Íslenskri erfðagreiningu og er fullkomnu öryggi og nafnleynd heitið. Guðmundur Magnússon, ritstjóri Eyjunnar, og fulltrúar Íslenskar erfðagreiningar munu á fundinum fara nánar yfir hvernig kosningin fer fram og hver tilgangurinn með henni sé.