Skólastoðin safnar ritföngum og bókum í Kringlunni

Í dag og á morgun fer fram ritfanga- og bókasöfnun Skólastoðarinnar en hún hefur það að markmiði að leggja skólabörnum lið við upphaf skólans nú í september. Leitað er til almennings og fyrirtækja um framlög, hvort heldur er í formi skólavarnings eða frjálsra fjárframlaga að því er fram kemur í tilkynningu.

„Í Kringlunni mun Skólastoðin safna ritföngum sem telja má nauðsyn fyrir hvert skólabarn. Í kjölfarið verður settir saman ritfangapakkar en í þeim verða helstu grunnverkfæri nemenda. Þeim verður úthlutað í samstarfi við Fjölskylduhjálp Íslands eftir helgina 28.-30. ágúst á stað sem auglýstur verður síðar," segir einnig.

Skólastoðin leitar eftir framlögum frá almenningi og fyrirtækjum. „Til dæmis er óskað eftir pennum, blýöntum, trélitum, stílabókum, gráðubogum, skærum, dósayddurum, reglustikum, plastvösum og öðru því sem gagnast gæti skólabörnum í upphafi skólaársins. Hugsanlega eru einhverjir sem eiga þessa hluti ónotaða og vel með farna í fórum sínum sem hægt er að ánafna í söfnunina. Jafnvel eru einhverjir til í að kaupa eitthvað af þessum hlutum og gefa til söfnunarinnar."

Auk þess að safna ritföngum mun Skólastoðin taka við notuðum námsbókum fyrir framhaldsskólanema sem verður einnig dreift í samstarfi við Fjölskylduhjálpina.

„Mikilvægt er að sem flestir leggi hendur á plóg og leggi átakinu lið, annað hvort með því að gefa skólavarning, nýjan sem notaðan, eða fjárframlög. Hægt er að koma með hann til Skólastoðarinnar í Kringlunni fimmtudaginn 27. ágúst milli kl. 16 og 21 og föstudaginn 28. ágúst milli kl. 13 og 19 (fyrir framan verslunina Kúltúr á annarri hæð)."

Þá geta þeir sem vilja leggja átakinu lið með fjárframlögum lagt inn á bankareikning átaksins nr. 512-14-400999, kt. er 070183-3909. Fjármunum verður varið til kaupa á „verkfærum" sem minnst safnast af.