Meiri bílaumferð í júlí en í fyrra

Umferð var meiri í júlímánuði en í sama mánuði í fyrra, samkvæmt tölum frá Vegagerðinni. Heildaraukning í akstri milli ára er rúm sjö prósent. Vegagerðin mælir umferð á sextán stöðum víðs vegar um landið. Mælt er á þremur stöðum á Suðurlandi, Vesturlandi og Austurlandi, fimm stöðum á Norðurlandi og tveimur á höfuðborgarsvæðinu.

Hlutfallslega jókst aksturinn mest á Austurlandi eða um rúm ellefu prósent. Minnst var aukningin á höfuðborgarsvæðinu, tæp tvö prósent.

Þegar fyrstu sjö mánuðir ársins eru bornir saman við sömu mánuði á síðasta ári kemur í ljós að aukning í akstri er 2,7 prósent á landinu öllu. Mesta aukningin þar er einnig á Austurlandi. Aksturinn jókst í öllum landshlutum nema á höfuðborgarsvæðinu, þar sem hann minnkaði um 1,7 prósent. Að mestu leyti má rekja það til samdráttar á akstri um Geitháls, sem er einn mælistaðanna.

Akstur Íslendinga á árinu virðist ætla að fara fram úr akstri ársins 2007, sem var metár að sögn Friðleifs Inga Brynjarssonar, verkefnastjóra hjá Vegagerðinni. „Svo datt umferðin niður árið 2008. Þá var strax farið að bera á minnkun í mars eða apríl,“ segir Friðleifur Ingi.- þeb