Lufthansa fellur frá kaupum á SAS

Þýska flugfélagið Lufthansa hefur fallið frá öllum hugmyndum um að kaupa skandinaviska SAS flugfélagið.

Christoph Franz sem á sæti í stjórn Lufthansa hefur staðfest þetta í viðtali við vefsíðuna börsen.dk.

Franz segir að Lufthansa geti ekki leyst öll þau vandamál sem hin alþjóðlega flugumferð stendur andspænis.

Hann bætir því við að með kaupum í bæði British Midland og Austrian airlines hafi þýska flugfélagið nóg á sinni könnu. Félagið sé einnig sjálft með nokkuð þunga bagga.

Mikið tap hefur verið hjá SAS undanfarin misseri og ýmissa leiða leitað til þess að bjarga félaginu.