Ríkislögreglustjóri kallar saman baráttuhóp gegn Vítisenglum

Ríkislögreglustjóri ætlar að kalla saman baráttuhóp lögreglunnar gegn Hells Angels strax eftir helgi. Mótorhjólaklúbburinn Fáfnir var lagður niður í síðustu viku og lét Jón Lúther Traustason, dæmdur ofbeldismaður, af formennsku. Þá tók við Einar Boom Marteinsson sem er kenndur við barinn Boom Kicker sem hann rak í Hafnarstræti.

Fáfnir hefur lengi stefnt að inngöngu í Vítisengla og haft stöðu svokallaðra áhangenda. Fréttastofa náði sambandi við nýja formanninn í dag - og staðfesti hann að klúbburinn hefði nú gengið inn í Vítisengla og fengið stöðu prospect klúbbs, eða væntanlegra félaga. Næsta skref er fullgild þátttaka. Einar gat ekki veitt miklar upplýsingar svo við prófuðum að banka upp á í félagsheimili samtakanna. Einar Boom vildi ekki veita viðtal en sagði þó að á stefnuskrá klúbbsins væri það eitt að keyra mótorhjól og hlúa að fjölskyldum félaga.

Lögregluyfirvöld hafa efasemdir um þennan tilgang, og hafa barist gegn tilurð Vítisengla á Íslandi. Ríkislögreglustjóri ætlar að kalla baráttuhóp gegn Hells angels til fundar strax eftir helgi. Hann segir hugsanlega leið til að verjast Hells angels sé að alþingi setji lög sem banni starfsemi skipulagðra glæpasamtaka sem sannanlega hafi orðið uppvís að glæpastarfsemi.

Ríkislögreglustjóri segir ástæðu til að óttast samtökin og vísar meðal annars til rokkarastríðanna á Norðurlöndum. Þau hafi endað með skelfingu. Menn hafi látið lífið og það sé veruleg fíkniefnasala, mansal og alls kyns glæpastarfsemi sem tengist Hells Angels.