Fylgjast með íslensku Vítisenglunum

Bæjaryfirvöld í Hafnarfirði hafa ásamt lögreglunni fylgst með starfsemi Fáfnismanna, eða Hells Angels Prospects, eins og þeir heita nú, eftir að klúbburinn fluttist í Hafnarfjörð í vor.

Stutt er síðan að nafni vélhjólaklúbbsins var breytt en hann er nýorðinn opinber stuðningsaðili að Vítisenglum og er það liður í átt að fullgildri félagsaðild. Þá er Jón Trausti Lúthersson, sem var formaður Fáfnis, hættur í klúbbnum en nýr formaður hefur tekið við. Hann heitir Einar „Boom" Marteinsson, eins og Vísir greindi frá á föstudaginn og fjallað var um í kvöldfréttum Stöðvar 2.

Lúðvík Geirsson bæjarstjóri í Hafnarfirði segir að málin hafi verið skoðuð frá því í vor þegar fréttist af því að klúbburinn væri fluttur af Hverfisgötunni og búinn að koma sér upp aðstöðu í Hafnarfirði. Hann kannast ekki við það að Hafnfirðingar hafi orðið fyrir ónæði vegna klúbbsins. „Þetta er yst í iðnaðarhverfi, fjarri allri íbúðarbyggð. Þannig að í sjálfu sér er ekkert sem bannar þeim að vera þarna með sína starfsemi," segir Lúðvík.

Hann segir að það sé lögreglunnar að fylgjast með því hvort að félagið sé með löglega starfsemi. Það sé hins vegar bæjaryfirvalda að sjá til þess að byggingarskilmálar og skipulag sem gildi á svæðinu sé virt. „Það er ekki gert ráð fyrir því né heimild til þess að þarna sé einhver samkomustaður eða gisting eða neitt," segir Lúðvík.