Barnabarn Stalíns stefnir dagblaði

Barnabarn rússneska einræðisherrans Josefs Stalin hefur höfðað mál gegn rússnesku dagblaði og fullyrðir að blaðið hafi lítilsvirt minningu hans.

Maðurinn sem heitir Yevgeny Dzhugashvili segir að grein í blaðinu Novaya Gazeta þar sem fullyrt er að Stalín hafi persónulega fyrirskipað aftökur sovéskra borgara sé lygi.

Blaðið birti minnisblað, sem fullyrt er að Stalin hafi undirritað, þar sem skipað er fyrir um aftöku fólksins.

Dzhugashvili var ekki viðstaddur þegar málið var þingfest í Moskvu í gær. Hann fullyrðir að fréttin sé ósönn og að Stalin hafi aldrei persónulega fyrirskipað neinar aftökur.

Fréttaritari BBC fréttastofunnar segir að á undanförnu hafi ýmislegt furðulegt verið gert til þess að reyna að fegra minningu Stalins. Þessi Stefna barnabarnsins sé ein af þeim aðgerðum.

Hópur stuðningsmanna Stalins safnaðist saman fyrir framan dómhúsið þegar málið var þingfest í gær. Fólkið sagði að Sovétríkin hefðu notið virðingar á tímum Stalins. Nú væri litið á Rússa sem auma betlara.