Fréttablaðið höfðar til flestra

„Það er ánægjulegt að sjá að Fréttablaðið fellur vel í kramið hjá fólki. Stefnan hefur verið allt frá upphafi þess árið 2001 að Fréttablaðið yrði dagblað þjóðarinnar. Það takmark náðist mjög fljótt og það er ánægjulegt að blað sem ekki er orðið tíu ára gamalt skuli vera búið að ná tryggri stöðu. Við getum ekki annað en verið þakklát fyrir það," segir Jón Kaldal, ritstjóri Fréttablaðsins.

Í niðurstöðum nýrrar fjölmiðlakönnunar Capacent telja flestir Fréttablaðið sér að skapi. Meirihluti þátttakenda telur upplýsingar blaðsins sömuleiðis mikilvægar, auk þess sem flestir nota blaðið þegar þeir slaka á.

Könnunin nær aðeins til Fréttablaðsins og Morgunblaðsins og netmiðilsins mbl.is.

Sambærileg könnun fyrir ári var mun umfangsmeiri og náði jafnt til netmiðla sem flestra tímarita. Könnunin var fyrst framkvæmd árið 2006 og náði þá jafnframt til sjónvarps- og útvarpsstöðva.

Fréttablaðið fær flest stig í þremur liðum af sex í könnuninni nú. Í tveimur fær það jafn mörg stig og Morgunblaðið en minna í einum lið.

Flestir þátttakenda telja blaðið að sínu skapi og gefa því 3,5 stig af fimm mögulegum. Það er 0,1 stigi minna en fyrir ári. Næstflestir telja það veita þeim mikilvægar upplýsingar og gáfu blaðinu 3,4 stig, sem er óbreytt á milli ára. Þá nota margir blaðið þegar þeir slaka á. Í þeim lið fékk blaðið 3,1 stig, sem er 0,1 stigi minna en í fyrra.