„Bíðið bara þangað til græningjarnir koma líka til Íslands“

Olíuútboð Íslendinga eykur þrýsting á ríkisstjórn Noregs að leyfa olíuleit á norska hluta Jan Mayen-svæðisins. Andstaða er innan norsku stjórnarflokkanna gegn nýjum vinnslusvæðum á norðurslóðum.

Skiptar skoðanir eru innan hinnar rauðgrænu ríkisstjórnar Noregs um hvaða ný svæði eigi að opna til olíuleitar og Hans Henrik Ramm, sérfræðingur í olíumálum, telur útboð Íslendinga setja stjórnarflokkana í vanda. Þetta gæti orðið þeim pólitískt erfitt.

Olíuframleiðsla Norðmanna náði hámarki fyrir áratug og síðan hefur hratt dregið úr vinnslunni eftir því sem gengur á lindirnar. Olíuiðnaðurinn vill ný svæði.

„Olíuiðnaðurinn hefur fengið meiri áhuga á Drekasvæðinu. Það hefur komið fram í mörgum skýrslum frá þessum geira að menn vilja hefjast handa á Jan Mayen-hryggnum," segir Hans Henrik Ramm, og segir menn telja mikla möguleika þar.

Í umræðu um olíumál í Stórþinginu í síðustu viku vildi hægrimaðurinn Ivar Kristiansen að olíumálaráðherrann Terje-Riis Johansen greindi frá áformum ríkisstjórnarinnar um Jan Mayen-svæðið en fékk ekkert svar. Hann hefði viljað sjá Norðmenn taka höndum saman við Íslendinga.

„Í stað þess að líta á þetta sem vandamál ætti frekar á líta á þetta svæði þannig að það skapi mikla möguleika, einnig fyrir Noreg," segir Ivar Kristiansen. "Ekkert væri betra en að Íslendingar gætu nú líka tekið þátt í alþjóðlegri og innlendri olíu- og gasstarfsemi," segir Ivar.

Hans Henrik Ramm segir að í Noregi sé andstaða meðal græningja við nokkurn veginn allt sem á að framkvæma.

„Þeir vilja helst loka á alla olíuvinnslu. Bíðið bara þangað til þeir koma líka til Íslands," segir Hans Henrik, og segir norska græningja þekkta fyrir að ferðast um til að mótmæla á ýmsum stöðum.