Lögreglumenn leiðbeina ekki grunskólabörnum vegna fjárskorts

Lögreglumenn sjást ekki lengur við grunnskólana, fyrstu dagana eftir að skólastarfið hefst, eins og venjan hefur verið til að tryggja öryggi barnanna á meðan þau eru að venjast aðstæðum.

Í Reykjavík og síðan á höfuðborgarsvæðinu hvíldi þetta starf á almennu deild lögreglunnar, en ekkert slíkt er nú í gangi af hennar hálfu, eftir því sem fréttastofan kemst næst. Umferðardeildin getur ekki sinnt þessu heldur, því umferð á helstu umferðaræðum og gatnamótum hátt í tvöfaldast fyrstu skóladagana þannig að menn þar á bæ reyna að vakta það. Fréttastofan hefur líka fengið ábendingu frá Akureyri um að lögreglan sjáist þar lítið sem ekkert við skólana.

Lögreglumönnum, sem fréttastofan hefur rætt við þykir þetta miður, því jákvæð tengsl hafi skapast við börnin í gegnum þetta starf, en nú sé ekki svigrúm til þessa lengur.

Skólastjóri sem hafði samband við fréttastofuna vegna þess sama, sagðist sakna lögreglumanna, öryggis barnanna vegna, því reynslan hafi sýnt að ökumenn dragi verulega úr hraða í grennd við skóla, þegar lögreglumenn eru þar á vettvangi.