NASA gæti hætt við tunglleiðangur

Bandaríska geimvísindastofnunin NASA íhugar að hætta við áætlun sína um tunglferð og einbeita sér frekar að Mars.

Þetta kemur fram í skýrslu frá stofnuninni sem nú neyðist til að velja og hafna verkefnum eftir að þau skilaboð bárust frá Hvíta húsinu að allt geimbrölt væri háð peningum og fjárveitingum sem ekki yxu á trjám um þessar mundir. Þetta vita menn hjá NASA mætavel enda hefur tæpum átta milljörðum dollara verið varið til hönnunar nýrrar tunglflaugar sem þó er að mestu leyti enn á teikniborðinu.

Í skýrslunni eru settar fram hugleiðingar um að ef til vill sé því heppilegt að láta tunglið eiga sig í bili, menn hafi hvort eð er þegar komið þangað, en leggja þess í stað allt kapp á að komast til rauðu plánetunnar Mars. Þegar er í gildi 30 ára áætlun sem gengur undir heitinu Mars-kynslóðin, eða Generation Mars, og miðast öll að því að menn drepi þar niður fæti.

Sú áætlun kostar um þrjá milljarða dollara á ári og þar sem ekkert er í hendi með fjárveitingar er ekki nema von að stjórnendur NASA velti vöngum yfir því hvar hentugast sé að nema land næst.