Niðurskurður hjá dómstólum gæti haft alvarlegar afleiðingar

Stefán Már Stefánsson, lagaprófessor við Háskóla Íslands, segir nauðsynlegt að fjölga dómurum, aðstoðarmönnum þeirra og öðru starfsfólki dómstóla. Verði fjárveitingar til dómstóla skornar niður eins og gert er ráð fyrir í fjárlagafrumvarpi fyrir árið 2010 án þess að gerðar verði skipulags- og fjárhagsráðstafanir verði afleiðingarnar alvarlegar.

Í aðsendri grein í Morgunblaðinu bendir Stefán Már á að helstu afleiðingarnar yrðu þær að mál sem komi til dómstólana verði ekki tekin til meðferðar og þau afgreidd innan eðlilegs tíma. Þau bíði einfaldlega í biðröð sem verði að teljast óviðunandi. „Þannig munu aðilar einkamála og sakborningar í sakamálum þurfa að bíða von úr víti í óvissu um réttarstöðu sína. Að auki munu dómstólar ekki leysa úr ágreiningsefnum og eyða réttaróvissu sem óhjákvæmilega rís sem afleiðing efnahaghrunsins. Slíkt réttarkerfi er ófullnægjandi og telst annmarki á réttarríkinu," segir Stefán Már.

Auk þess að fjölga dómurum og starfsfólki dómstóla vill Stefán kanna hvort unnt sé að fela löglærðum aðstoðarmönnum afgreiðslu einfaldari mála í meira mæli en nú er. Hann vill hraða skipulagsbreytingum sem miði meðal annars að því að dreifa betur álagi milli dómenda landsins og rýmka heimildir til að kveða til sérfróða meðdómsmenn til setu í dóma til að mæta þeirri sérkunnáttu sem þörf verði á.