Sakar skilanefndina um að vinna fyrir MP

Nýja Kaupþing hefur kvartað til Fjármálaeftirlitsins vegna tölvupósts sem fyrrverandi viðskiptavinur SPRON fékk frá sparisjóðnum, þar sem hann var hvattur til að snúa sér til MP Banka með sín viðskipti.

Maðurinn sendi skilanefnd SPRON fyrirspurn um innlánsreikning sinn, sem eftir fall bankans var tekinn í vörslu Kaupþings. Samdægurs barst honum svar frá þjónustuveri SPRON. Í niðurlagi svarsins segir: „Við hvetjum alla þá sem vilja koma í viðskipti við SPRON að setja sig í samband við starfsfólk útibúa SPRON frá og með mánudeginum 6. apríl. Einnig er hægt að skrá sig á forsíðu www.mp.is og starfsmenn SPRON munu hafa samband við þig á næstunni."

Umræddan mánudag stóð til að MP Banki myndi opna nýjan viðskiptabanka með þremur útibúum undir merkjum SPRON. Það hefur nú frestast vegna þess að Fjármálaeftirlitið á eftir að samþykkja kaupin.

„Mér finnst mjög óeðlilegt að skilanefnd sem á að vera að vinna fyrir kröfuhafa sé að starfa sem markaðsdeild fyrir þá aðila sem hún hefur verið að selja útibúin," segir Finnur Sveinbjörnsson, bankastjóri Kaupþings. Það kæmi Kaupþingi afar illa ef allir þeir sem áttu fé á reikningum hjá SPRON hlypu til og færðu það yfir í nýja SPRON þegar bankinn tekur til starfa. Það sé því einkennilegt af skilanefnd gamla SPRON að hvetja til þess. Það sé ekki hlutverk hennar.

Kaupþing er eftir yfirtöku innlánsreikninganna langstærsti kröfuhafinn í þrotabú SPRON.

Hlynur Jónsson, formaður skilanefndar SPRON, kannast ekki við póstinn og segir ljóst að hann sé ekki frá skilanefndinni kominn. Um leið og ábending hafi borist um að póstur af þessu tagi kunni að hafa farið frá bankanum hafi menn farið að grennslast fyrir um uppruna hans. Það hafi ekki enn borið árangur.

Hann segir niðurlag póstsins óheppilegt, ekki síst í ljósi þess að kaup MP Banka á útibúanetinu séu ekki enn frágengin. „Við lítum þetta mjög alvarlegum augum. Við munum að sjálfsögðu reyna að komast til botns í þessu máli og grípa til viðeigandi ráðstafana."stigur@frettabladid.is