Brýtur ekki í bága við stjórnarskrána

Þriðja og síðasta umræða um Icesave frumvarp ríkisstjórnar hófst á Alþingi í dag þegar Guðbjartur Hannesson, formaður fjárlagalefndar, mælti fyrir framhaldsnefndaráliti meirihluta nefndarinnar. Hann sagði ekkert í frumvarpinu brjóta í bága við stjórnarskrána. Atkvæðagreiðsla mun væntanlega fara fram á miðvikudag.

Fjárlaganefnd Alþingis lauk sinni umfjöllun um frumvarpið fyrir jól. Málið var afgreitt úr nefnd með atkvæðum meirihluta en stjórnarnandstaðan vildi ræða málið áfram.

Þriðja og síðasta umræða hófst rétt fyrir klukkan tvö en þingmenn höfðu þá deilt um hvort að búið að hafi verið að ákveða fyrir jól hvernig umræðunni yrði háttað í þessari viku og þá hvort að þingfundur ætti standa fram á kvöld.

Guðbjartur sagði það mat sérfræðinganna Helga Áss Grétarssonar, Eiríks Tómassonar, Bjargar Thorarensen og Davíðs Þór Björgvinssonar að frumvarpið feli ekki í sér framsal á löggjafarvaldi til annarra ríkja og alþjóðastofnanna þannig að stjórnarskrárbundnu fullveldi sé stefnt í hættu. Lagaheimild til veitingar ríkissábyrgðar sé skýr. Frumvarpið brjóti því ekki í bága við stjórnarskrána.

„Með vísan til þessara gagna sem fylgja málinu telur meirihluti fjárlaganefndar að því sé afdráttarlaust svarað að ekkert í frumvarpinu fari í bága við ákvæði stjórnarskrárinnar," sagði Guðbjartur.