Stefnir í minni halla

Steingrímur J. Sigfússon, fjármálaráðherra, segir að allt stefni í að minni halli verði á rekstri ríkissjóðs en fjárlög gerðu ráð fyrir. Vel er hægt að hækka tekjur ríkisins með öðrum hætti en hækka skatta, að mati Bjarna Benediktssonar formanns Sjálfstæðisfloksins. Hann var málshefjandi í umræðu utan dagskrár á Alþingi í dag um skattaáform ríkisstjórnarinnar.

Steingrímur sagði horfur hafa heldur batnað og útlit sé fyrir að halli ríkissjóðs verði minni en fjárlagafrumvarpið sem lagt var fram í september geri ráð fyrir.

„Það er aðallega af tvennum ástæðum. Það er að draga nokkuð úr útgjaldaþörf. Sérstaklega er það vaxtakostnaður ríkisins sem mun verða lægri á árinu því að það hefur gengið vel í endurreisn bankakerfisins. Ríkið mun sleppa frá því með muni minni kostnað og fjárbindingu enn í stefndi svo numið getur að minnsta kosti 10 og jafnvel allt að 17 milljarða lægri vaxtakostnaði. Í öðru lagi þá eru atvinnuleysishorfur heldur betri," sagði ráðherrann.

Bjarni sagði fjárlagafrumvarpið vera uppfullt af götum og að ýmsar spurningar hefðu vaknað og þeim væri enn ósvarað. Hann gagnrýndi að ekkert samráð hafi verið haft við stjórnarandstöðuna og að ráðherrar hefðu einkum tjáð sig um fyrirhugaðar skattahækkanir á tröppum stjórnarráðsins.

„Vinstristjórnin segir að nú þurfi að bæta fyrir þann skaða sem að nýfrjálshyggjan hafi valdið skattkerfinu í landinu. Því er haldið fram að skattar hafi lækkað svo mikið að tekjustofnar ríkisins standi ekki lengur undir gjöldunum. Með þessu er sem sagt verið að segja að vandinn liggi í því að fjárlagagatið stafi að of lágum sköttum. Þetta stenst enga skoðun. Fjárlagagatið er ekki til komið vegna þess að skattar hafi lækkað svo mikið á Íslandi. Fjárlagagatið er vegna þess að skattstofnanir hafa gefið eftir," sagði Bjarni.

Steingrímur sagði að til að fást við mikinn halla verði að fara blandaða leið niðurskurðar ríkisútgjalda og skattahækkana.

Formaður Sjálfstæðisflokksins fullyrti að hægt sé að hækka tekjur ríkisins með öðrum hætti en að hækka skatta. „Við höfum bent á leiðir. Þær eru raunhæfar. Þær felast í því að ríkið taki til sín frestaðar skatttekjur í lífeyrissjóðakerfinu. Horfum á séreignarsparnaðinn. Með því að nýta þá leið getum við lokað fjárlagagatinu og komið í veg fyrir frekar skuldasöfnun ríkisins," sagði Bjarni.

Fjármálaráðherra gaf lítið fyrir hugmyndir sjálfstæðismanna. Þær væru afar óábyrgar. „Tökum bara út á risastór lán hjá kynslóðum framtíðarinnar. Tökum þetta bara út hjá lífskjörum lífeyrisþega og tekjum ríkis og sveitarfélaga í gegnum lífeyrissjóðakerfið. Það er leið sjálfstæðisflokksins. Hún er ekki mjög ábyrg," sagði Steingrímur.