Enn ekki nóg af loðnu

Ekki finnst enn nægileg loðna á hefðbundnum loðnuslóðum, til þess að Hafrannsóknastofnun geti gefið út kvóta svo hægt verði að hefja veiðar. Í góðu árferði hefst loðnuvertíðin af fullum krafti strax upp úr áramótum.

Hafrannsóknaskipið Árni Friðriksson er nú að leita fyrir austan land og hefur af og til fundið loðnu, en ekki í nægilegu magni til að réttlæta veiðar. Sjómenn og útvegsmenn loðnuskipa hafa nú vaxandi áhyggjur af því að loðnuvertíðin verði óvenju stutt, og í versta falli að það verði engin loðnuvertíð í ár, en síðasta loðnuvertíð gaf af sér níu milljarða króna í útflutningsverðmæti.Þótt aflilnn á henni hafi verið langt undir meðallagi, þá var verðmætið hlutfallslega minna undir meðallagi þar sem óvenju hátt hlutfall aflans var unninn til manneldis og fékkst því mun meira fyrir hann en ella. þónokkur skip, sem í venjulegu árferði væru byrjuð loðnuveiðar, eru nú á kolmunnaveiðum suður af Færeyjum, þar sem óveður eru tíð á þessum árstíma.