Tveir hnakkaþjófar handteknir

Lögreglan hefur lagt hald á yfir þrjátíu hnakka sem stolið var í fjölda innbrota í hesthús á höfuðborgarsvæðinu fyrr í mánuðinum. Í gær voru tvær konur handteknar í þágu rannsóknarinnar og hafa þær báðar játað sök. Tveir aðilar til viðbótar tengjast þessum innbrotum sem eru að mestu upplýst.

Þjófunum tókst að selja eitthvað af hnökkum en unnið er að því að endurheimta þá. Hnakkarnir, sem voru haldlagðir, voru faldir á ýmsum stöðum á höfuðborgarsvæðinu en þeir fundust við húsleitir sem og nokkrir aðrir munir sem einnig var stolið í þessum innbrotum. Það eru lögreglumenn á svæðisstöðinni í Hafnarfirði sem fara með rannsókn málsins.

Sem fyrr hvetur lögreglan fólk til að vera á varðbergi og hafa samband ef grunsemdir vakna, til dæmis þegar þýfi er annars vegar. Þá minnir lögreglan á að refsivert getur verið að kaupa þýfi.