Vill forsætisráðherra utan þings

Það kemur vel til greina að maður utan þings taki að sér að leiða þjóðstjórn, segir Jón Magnússon, formaður þingflokks Frjálslynda flokksins.

Jón segir að það geti vel verið álitlegur kostur að mynda þjóðstjórn. Þeirri skoðun hafi hann sjálfur og Guðjón Arnar Kristjánsson, formaður flokksins, lýst í umræðum á Alþingi í síðustu viku.

Jón segir þó varla koma til greina að Geir Haarde, fráfarandi forsætisráðherra, stýri þeirri ríkisstjórn. „Persónulega finnst mér það eðlilegra að það kæmu aðrir að en þeir sem hefðu verið helstu örlagavaldar síðustu daga," segir Jón. Jón vill ekki greina frá því nákvæmlega hver ætti að leiða stjórnina. Engar umræður séu farnar í gang og ekki ljóst ennþá hvort til myndunar þjóðstjórnar geti komið. Hann gæti þó vel hugsað sér að forsætisráðherrann væri ekki hluti af þinginu.

Þá segir Jón að ef til myndunar þjóðstjórnar komi þurfi sú stjórn að starfa lengur en til nokkurra mánaða. Sú stjórn yrði að starfa þangað til að þjóðin væri komin í gegnum mestu efnahagserfiðleikana sem að steðja. „Það verður að vera eitthvað markmið með þjóðstjórn," segir Jón.