SUS hafnar skuldsetningu framtíðarkynslóða

Samband ungra sjálfstæðismanna átelur ríkisstjórn Jóhönnu Sigurðardóttur fyrir að steypa íslenskri þjóð í skuldaánauð með því að samþykkja, það sem getur ekki kallast annað en fyrirvaralaus ríkisábyrgð á Icesave samningunum samkvæmt ályktun sem þeir sendu fjölmiðlum.

Þar segir að ungir sjálfstæðismenn krefjist þess að Alþingi standi í lappirnar og fallist ekki á ný lög um rangláta og fyrirvaralausa ríkisábyrgð. Vilji Bretar og Hollendingar fá úr því skorið hvort Íslendingum beri að greiða þessa skuld, geta þeir leitað til dómstóla.

Orðrétt segir svo:

Ungir sjálfstæðismenn hafa áður bent á að ef Alþjóðagjaldeyrissjóðurinn tekur þátt í að kúga Ísland til óhagstæðrar niðurstöðu í þessu máli, þá sé það skylda stjórnvalda að vekja athygli á því á alþjóðlegum vettvangi. Slíkur fantaskapur er misnotkun á alþjóðlegum stofnunum. Verulegur vafi er því á því hvort íslenska ríkinu beri lagaleg skylda til að greiða þennan reikning - enda þyrfti Alþingi ekki að samþykkja sérstaka ríkisábyrgð á samningunum ef skyldan væri skýlaus.

Það að hverfa frá þeim fyrirvörum sem settir voru við samningana kallar aðeins á að ungt fólk verði alla sína ævi að greiða fyrir afglöp ríkisstjórnar Samfylkingarinnar og Vinstri grænna. Slík niðurstaða er ekki boðleg landi og þjóð. Ríkisstjórn Jóhönnu Sigurðardóttur hefur algjörlega mistekist að koma sjónarmiðum Íslendinga á framfæri á erlendum vettvangi - þrátt fyrir að hafa setið að völdum í tæpa níu mánuði og ítrekað verið bent á nauðsyn þess að halda uppi slíkri málsvörn. Minnimáttarkennd og undirlægjuháttur ríkisstjórnarinnar gagnvart erlendum aðilum í þessu máli er staðreynd.