Þiggur ekki þriðja sætið - vill baráttusætið

Lúðvík Geirsson, bæjarstjóri í Hafnarfirði, ætlar ekki að taka þriðja sæti á framboðslista Samfylkingarinnar í Suðvesturkjördæmi fyrir þingkosningarnar 25. apríl. Þess í stað vill hann skipa baráttusæti flokksins. Nái Lúðvík kjöri lætur hann af störfum sem bæjarstjóri.

Lúðvík sóttist eftir oddvitasætinu í prófkjöri flokksins en tapaði fyrir Árna Páli Árnasyni. 57 atkvæðum munaði á þeim en 147 atkvæði voru dæmd ógild vegna þess að viðkomandi fundust ekki í félagatali Samfylkingarinnar.

Fimmta sætið er baráttusæti Samfylkingarinnar

,,Ég skoðaði alla fleti. Þetta er niðurstaðan og hún er í góðu samráði við mitt fólk," segir Lúðvík aðspurður hvort hann hafi íhugað að taka ekki sæti á framboðslista flokksins.

Lúðvík hefur boðist til að skipa fimm sætið eða baráttusæti flokksins. Í kosningunum 2003 og 2007 hlaut Samfylkingin fjóra þingmenn kjörna í Suðvesturkjördæmi.

Óánægja með niðurstöðu prófkjörsins

Lúðvík segist ekki hafa verið að bjóða sig fram í þriðja sætið. Fáum atkvæðum hafi munað á honum og Árna Páli og tekist hafi verið á um rúmlega 150 atkvæði.

,,Það liggur fyrir að það hefur verið ólga og ósætti í bænum meðal þeirra sem áttu þessu atkvæði. Þá met ég það þannig að það sé skynsamlegast að ég taki þeirri áskorun að bjóða mig fram í baráttusætið til að ná saman okkar liði hér í Hafnarfirði til að keppa af því marki að vinna það sæti," segir Lúðvík og bætir við að fimmta sætið hafi lengi verið keppikefli samfylkingarfólks í kjördæminu.



Hættir sem bæjarstjóri nái hann kjöri

Lúðvík segir að um tilboð sé að ræða af sinni hálfu sem kjördæmisráð flokksins eigi eftir að taka afstöðu til. Auk þess eigi eftir að samþykja framboðslista flokksins.

Lúðvík á inni sumarleyfi sem hann hyggst nýta seinustu vikurnar fyrir kosningar skipi hann baráttusætið.

Þá sér Lúðvík ekki fyrir sér að starfa áfram sem bæjarstjóri nái hann kjöri í kosningunum.