Áhorfendum fækkaði annað árið í röð

Áhorfendum á leiki í Pepsi-deild karla fækkaði á nýliðnu keppnistímabili en alls mættu 135.783 áhorfendur á leikina eða 1.029 áhorfendur að meðaltali á leik. 1.106 manns komu að meðaltali á völlinn 2008 og metárið 2007 mættu 1329 manns að meðaltali á leikina.

Knattspyrnusambandið birti í dag opinberar tölur yfir áhorfendaaðsóknina í sumar og má sjá fréttina hér fyrir neðan.

Alls mættu 135.783 áhorfendur á leiki Pepsi-deildar karla á nýliðnu keppnistímabili eða 1.029 áhorfendur á leik að meðaltali. Er þetta fækkun um rúmlega 10.000 manns frá síðasta tímabili en þá voru áhorfendur 1.106 að meðaltali á leik.

Flestir mættu að jafnaði á KR völlinn eða 1.676 að meðaltali en næstbest var aðsóknin að Kaplakrika en þar voru 1.532 að meðaltali á hverjum leik. Helmingur félaganna í Pepsi-deildinni var með yfir 1.000 áhorfendur að meðaltali í leik.

Flestir mættu einnig á leiki KR þegar þeir léku á útivöllum eða 1.228 að meðaltali. Næstflestir voru á útileikjum hjá Val þar sem 1.207 áhorfendur mættu að meðaltali.

Flestir áhorfendur mættu á leik FH og Vals eða 2.718 og næstflestir sáu viðureign KR og FH eða 2.370. Fæstir áhorfendur mættu hinsvegar á leik Fram og Þróttar í síðustu umferðinni en þar voru staddir 357 áhorfendur.