Gunnar Birgisson: Tekur til á skrifstofunni og stefnir á hnéaðgerð

„Ég tjái mig ekkert um það," svarar Gunnar Birgisson, fráfarandi bæjarstjóri Kópavogs, spurður um ströng skilyrði Framsóknarflokksin sem hafa sett það sem skilyrði að snúi Gunnar aftur í bæjarstjórn þá þurfi að endursemja um samstarf Sjálfstæðisflokks og Framsóknar á ný.

Gunnar segist ekkert tjá sig um þau skilyrði en tekur fram að allir séu þeir skynsamir bæjarfulltrúarnir.

Ungir Framsóknarmenn sendu frá sér ályktun í dag þar sem þeir hvöttu Gunnar til þess að afsala sér biðlaunum á meðan hann væri í leyfi. Sjálfur sagðist Gunnar ekki hafa lesið þessa ályktun sjálfur.

„Þeir geta haft sínar skoðanir. En þegar ungir Framsóknarmenn leggja eitthvað til þá tek ég nú ekki mikið mark á því," segir Gunnar um kröfu ungra framsóknarmanna.

Þegar blaðamaður náði tali af Gunnari var hann í óða önn að taka til á skrifstofunni. „Ég er bara að sortera og henda," segir hann enda búinn að vera bæjarstjóri í fjögur ár.

Spurður hvað taki nú við segir hann að næst á dagskrá sé að fara í hnéaðgerð. Það hafi þó verið ákveðið með talsverðum fyrirvara og áður en brotsjór stjórnmálanna skall á Kópavogsbæ, upprunalega með skýrslu matsfyrirtækisins Deloitte. Þar var niðurstaðan að viðskipti Kópavogsbæjar við Frjálsa Miðlun, sem er í eigu dóttur Gunnars, væri óeðlileg.

Gunnar mótmæli þessu hinsvegar og fékk lögfræðistofuna Logos til þess að vinna fyrir sig annað mat. Sjálfur vildi hann meina að skýrsla Deloitte væri alvarlega ábótavant.

„En hún er skrýtin tík pólitíkin. Þar geta menn vænst algerra vendinga. Ég væli samt ekki undan því," segir Gunnar sem hyggst snúa aftur í stjórnmálin um leið og Fjármálaeftirlitið er búið að skoða málefni lífeyrissjóðs starfsmanna Kópavogs.