Samfylking vill banna innihaldslaus yfirboð

Borgarstjórnarflokkur Samfylkingarinnar hefur lagt fram tillögu þess efnis að bann verði lagt við „innihaldslausum yfirboðum" í aðdraganda kosninganna í vor.

Önnur umræða um fjárhagsáætlun Reykjavíkur stendur nú yfir í borgarstjórn og lagði Samfylkingin tillöguna fram við upphaf fundarins. „Tillagan er flutt í ljósi erfiðrar fjárhagsstöðu borgarinnar og í ljósi reynslunnar þegar Sjálfstæðisflokkurinn tapaði borginni síðast í kosningum," segir í tilkynningu frá Degi B. Eggertssyni oddvita Samfylkingarinnar.

Dagur segir að vorið 1994 hafi Sjálfstæðisflokkurinn ausið út um 800 milljónum króna umfram fjárheimildir eða hátt í tvo milljarða króna að núvirði. „Þessi spor hræða því þessi ábyrgðarlausi fjáraustur bættist ofan á skuldasöfnun áranna á undan og skildi fjármál borgarinnar eftir í rúst."

Tillaga Samfylkingarinnar sem verður afgreidd í lok umræðunnar er svohljóðandi:

Bann við innihaldslausum yfirboðum Borgarstjórn samþykkir að engar ákvarðanir sem leiða af sér kostnað fyrir borgarsjóð verði samþykktar fram að komandi kosningum án þess að ítarlegt mat á heildarkostnaði, afleiddum rekstrarkostnaði og samanburði við aðrar mögulegar leiðir til að ná sama markmiði liggi fyrir. Jafnframt þurfi að sýna fram á hvernig viðkomandi skuldbinding rúmist innan fjárhagslegs svigrúms Reykjavíkurborgar til framtíðar og til hvaða aðgerðar verði gripið til að eiga fyrir því. Í því skyni að leggja grunn að slíku mati verði lögð fram greining á fjárhagslegum umhverfi og þróun lykilstærða í efnhag- og rekstri Reykjavíkurborgar til næstu fimm ára.