Krafa um endurnýjun og öfluga talsmenn

Stefanía Óskarsdóttir, stjórnmálafræðingur, telur að niðurstöður í prófkjörum Sjálfstæðisflokksins í gær endurspegli annarsvegar kröfu um endurnýjun og hinsvegar vilja flokksmanna um að hafa atkvæðamikla og öfluga talsmenn í forystu. Hún segir að Samfylkingarfólk hafi refsað Össuri Skarphéðinssyni og að Jón Baldvin Hannibalsson geti gefið frá sér frekari stjórnmáladrauma.

Staða þingmanna Sjálfstæðisflokksins víða sterk

Stefanína segir að flestir þingmenn Sjálfstæðisflokksins hafi fengið góða kosningu. Sérstaklega í Reykjavík þar sem þeir hafi raðað sér í efstu sæti og erfitt hafi verið fyrir nýtt fólk að komast að. Erla Ósk Ásgeirsdóttir sé þó ný í efstu sætum og í öruggu þingsæti.

Undantekningin um gott gengi þingmanna hafi verið kosning Ármanns Kr. Ólafssonar í Suðvesturkjördæmi og Kjartans Ólafssonar og Bjarkar Guðjónsdóttur í Suðurkjördæmi. Stefanía telur að flokksmenn hafi kallað eftir atkvæðamiklum einstaklingum sem væru öflugir talsmenn flokksins. Það skýri að einhverju leyti af hverju þeim hafi ekki gengið betur.

Í Suðurkjördæmi hafi átt sér stað endurnýjun með innkomu Ragnheiðar Elínar Árnadóttur í oddvitasætið og tveggja kvenna í 3.-4. sæti. Unnur Brá Konráðsdóttir hafnaði í því þriðja og Írís Róbertsdóttir fjórða.

Flokksmenn refsuðu Össuri

Stefanía segir að frambjóðendur í prófkjöri Samfylkingarinnar í Reykjavík hafi flestallir verið þekkt nöfn úr stjórnmálastarfi. Margir hafi því verið um hituna. Hún segir að Sigríður Ingibörg Ingadóttir, Skúli Helgason og Valgerður Bjarnadóttir hafi öll fengið góða kosningu.

Stefanía telur að hreyfing innan flokksins hafi viljað refsa Össuri en hann fékk einugis þriðjung atkvæða í 1.-2. sætið. Annarsvegar sem einn af leiðtogum seinustu ríkisstjórnar og hinsvegar fyrir ólýðræðisleg vinnubrögð þegar að Ingibjörg Sólrún Gísladóttir kynnti á blaðamannafundi um framboð hennar, Össurar og Jóhönnu Sigurðardóttir í þrjú efstu sætin í prófkjöri flokksins. ,,Fólk ætlaði að láta hann finna fyrir því."

Ásta þurfti að hafa fyrir sæti sínu



Ásta Ragnheiður hefur í seinustu prófkjörum Samfylkingarinnar notið góðs af prófkjörsbaráttu Jóhönnu Sigurðardóttur, að mati Stefaníu. Nú hafi Jóhanna hinsvegar ekki háð eiginlega prófkjörsbaráttu og því hafi Ásta þurft að hafa meira fyrir sæti sínu en áður. Ásta endaði í 8. sæti en fyrstu tölur sýndu hana ekki meðal átta efstu.

Jón Baldvin hafnaði í 13. sæti af 19 í prófkjöri Samfylkingarinnar í Reykjavík. Sú niðurstaða kemur Stefaníu ekki á óvart þar sem fólk eigi sjaldnast mörg líf í pólitík. ,,Jón var búinn að taka út sinn skammt." Hún segir að nú sé komin mæling á stöðu Jóns. ,,Nú er komin niðurstaða í þetta mál og hann getur gefið frekari stjórnmáladrauma frá sér."

Sigurinn styrkir Árna Pál

Stefánía segir að sigur Árna Páls Árnasonar í Suðvesturkjördæmi komi til með að styrkja hann varaformannskjöri á komandi landsfundi Samfylkingarinnar. Hann hafi haft betur en bæjarstjóri Hafnarfjarðar.

Þórunn Sveinbjarnardóttir, fyrrum ráðherra, hafnaði í 4. sæti í prófkjörinu. Stefanía telur að ráðherradómur hennar og náin tengsl við Ingibjörgu Sólrúnu hafi haft áhrif á gengi hennar.