Aniston losaði sig við kærastann

Jennifer Aniston hefur sagt vinum sínum að hún sé hætt með söngvaranum og hjataknúsaranum John Mayer. Aniston er sögð hafa sagt honum upp eftir að hún kom úr kynningarferð frá Bretlandi í kringum myndina Marley & Me.

Það er breska götublaðið The Sun sem segir frá þessu í dag. Heimildarmaður blaðsins segir að ákvörðunin hafi komið í kjölfar þess að Mayer hafi virkað kaldur í kringum afhendingu Óskarsverðlaunanna.

Jennifer er sögð hafa andmælt fréttum þess efnis að Mayer hafi bundið enda á samband þeirra. Vinir hennar segja hana hafa verið reiða og liðið eins og hún hafi verið notuð.

„Þeim leið vel saman á Óskarnum, en hann varð kaldur strax þar á eftir. Það er niðurlægjandi og það er vægt til orða tekið að segja að hún sé særð," sagði heimildarmaður blaðsins.