Leiguíbúðir vantar á Langanes

Það er eins og kreppan hafi varla náð til Langaness. Þarna hafa allir nóg að gera, ekkert atvinnuleysi, fiskverð í hæstu hæðum og mikil umsvif, bæði í botnsfiskvinnslu og uppsjávartegundunum, - síldin og makríllinn hafa verið að skila dágóðum arði í land.

Og fólkið flytur sig þangað sem peningarnir eru: Í fyrra fjölgaði um 32 í Langanesbyggð og enn bætist við. Fjölgað hefur um 10-11 manns í ár, að sögn Gunnólfs Lárussonar sveitarstjóra og eru íbúarnir nú um 524. Miðað við 479 íbúa árið 2007 er fjölgunin nærri tíu prósent á tveimur árum.

Og allt þarf þetta nýja fólk þak yfir höfuðið. Gunnólfur segir að þarna sé skemmtilegt vandamál, - húsnæðisleysi. Það vanti iðnaðarmenn og vill hann fá aðila sem reka leiguþjónustur að koma og byggja íbúðir, þarna sé leigumarkaður. Kveðst Gunnólfur biðla til þeirra sem eru í þessum geira að koma á Þórshöfn og byggja leiguíbúðir.