Afhendir verðlaun

Breski leikarinn Sacha Baron Cohen verður á meðal þeirra sem afhenda verðlaun á næstu Golden Globe-verðlaunahátíð. Kynnir verður landi hans Ricky Gervais og búast margir við því að þeir bregði á leik á hátíðinni rétt eins og Gervais og Steve Carrell gerðu á síðustu Emmy-verðlaunahátíð.

Líklega mun Cohen nota tækifærið og kynna sína nýjustu mynd sem fjallar um samkynhneigða tískugúrúinn Bruno, sem gerði garðinn frægan í Ali G-þáttunum. Verður hún frumsýnd í maí næstkomandi.

Auk Cohens munu þau Salma Hayek, Jake Gyllenhaal, Jennifer Lopez og Drew Barrymore afhenda verðlaun á Golden Globe.