Trúnaðargögn Indriða hafa tvisvar lekið á netið

Tölvupóstssamskipti Indriða H. Þorlákssonar og fulltrúa Alþjóðagjaldeyrissjóðsins eru ekki fyrstu trúnaðargögnin frá Indriða sem komast fyrir almenningssjónir. Í byrjun september ritaði Indriði fjármálaráðherra minnisblað, sem fór einnig á netið.

Þann 13.apríl síðastliðinn skrifaði Indriði H. Þorláksson, þáverandi ráðuneytisstjóri í fjármálaráðuneytinu, Mark Flanagan og Franek Roswadovskí, sem fara með mál Íslands hjá Alþjóðagjaldeyrissjóðnum, tölvupóst. Sá póstur var birtur á netsíðunni Wikileaks í gær.

Tölvupósturinn hefur vakið nokkra athygli og var meðal annars ræddur á Alþingi, en hann er sendur úr tölvupóstfangi Indriða í ráðuneytinu. Samkvæmt upplýsingum þaðan hefur verið gengið úr skugga um að ekki var brotist inn í tölvukerfið þar.

Þetta er hinsvegar ekki í fyrsta skipti sem trúnaðargögn frá Indriða rata á netið.

Þann 2.september var Indriði á leið heim með flugi frá Kaupmannahöfn, en hann leiddi íslensku sendinefndina í samningum við Breta og Hollendinga á þeim tíma. Málið þótti gríðarlega viðkvæmt og óskuðu Bretar og Hollendingar sérstaklega eftir leynd og fjölmiðlar og almenningur fengu litlar upplýsingar um stöðu mála.

Á myndbandi sem farþegi tók á símann sinn, sést Indriði skrifa fjármálaráðherra minnisblað á fartölvu sína. Farþeginn sem sá minnisblaðið og fréttastofa hefur rætt við í dag segir að að þar hafi komið fram sterk viðbrögð Breta og Hollendinga við Icesave fyrirvörunum, sem Alþingi hafði þá nýlega samþykkt. Meðal annars að þeir vildu fá til baka hverja einustu krónu af Icesave skuldinni.

Þess ber að geta að fjármálaráðuneytið birti í dag niðurstöðu sína varðandi tölvupóstmálið, í 6 liðum á heimasíðu sinni.