Kannabisrækt í Kópavogi stöðvuð

Lögreglan á höfuðborgarsvæðinu stöðvaði kannabisræktun í húsi í Kópavogi síðdegis í gær. Við húsleit á áðurnefndum stað fundust um 50 kannabisplöntur, flestar á lokastigi ræktunar. Einnig var lagt hald á nokkra gróðurhúsalampa. Karl á fimmtugsaldri var yfirheyrður í tengslum við rannsókn málsins. Hann hefur játað sök í málinu, eftir því sem fram kemur í tilkynningu frá lögreglunni.

Lögreglan segir að fyrrnefnd aðgerð sé liður í að hamla gegn sölu og dreifingu fíkniefna en sem fyrr minnir lögreglan á fíkniefnasímann 800-5005. Í hann má hringja nafnlaust til að koma á framfæri upplýsingum um fíkniefnamál. Fíkniefnasíminn er samvinnuverkefni lögreglu og tollyfirvalda og er liður í baráttunni við fíkniefnavandann.