Bjóða upp á ókeypis tannlækningar

Tannlæknafélag Íslands og Tannlæknadeild Háskóla Íslands hafa tekið höndum saman og bjóða barnafjölskyldum sem búa við kröpp kjör upp á ókeypis tannlæknaþjónustu fjórar laugardaga í apríl og maí.

Fjárhagslegar aðstæður margra heimila hafa breyst til hins verra á undanförnum mánuðum og því viðbúið að mörg heimili neyðist til að spara við sig þegar kemur að tannviðgerðum og eftirliti hjá börnum, segir í tilkynningu. „Þegar við bætist að dregið hefur stórlega úr þátttöku íslenskra stjórnvalda á undanförnum árum í kostnaði vegna tannheilsu barna blasir ófremdarástand við."

Tannlæknarnir ætla að aðstoða þau heimili sem erfiðast eiga uppdráttar með sjálfboðavinnu við skoðun og viðgerðir tanna hjá börnum og unglingum. Ekki verður tekið við tímapöntunum en ráðstafanir verða gerðar til þess að biðtími verði ávallt hóflegur.

Boðið verður upp á þjónustuna laugardagana 4. apríl. 18. apríl, 9. maí og 23. maí. Þjónustan er fyrir börn og unglinga 18 ára og yngri og verður veitt milli 10 og 13 í húsnæði Tannlæknadeildar Háskóla Íslands, Læknagarði, að Vatnsmýrarvegi 16.