Hægt að svipta menn fálkaorðu

Hið minnsta tveir menn, sem voru áberandi í íslensku viðskiptalífi á þeim tímum sem uppgangur íslenskra fyrirtækja var sem mestur, hafa hlotið hina íslensku fálkaorðu. Björgólfur Guðmundsson, fyrrverandi stjórnarformaður Landsbankans, hlaut riddarakross, fyrir framlag til viðskiptalífs og menningar og Sigurður Einarsson, fyrrverandi stjórnarformaður Kaupþings, hlaut riddarakross fyrir forystu í útrás íslenskrar fjármálastarfsemi.

Í forsetabréfi segir að orðuna megi sæma innlenda einstaklinga eða erlenda fyrir vel unnin störf í þágu þjóðarinnar, einstakra þjóðfélagshópa eða landshluta, eða í þágu mikilvægra og góðra málefna á Íslandi eða á alþjóðavettvangi.

Fram hefur komið í tímaritinu Séðu og heyrðu að Sigurður Einarsson hyggst ekki skila Fálkaorðunni nú þegar skuldir ríkisins hafa stóraukist í kjölfar bankahrunsins. Í forsetabréfi kemur hins vegar fram að orðunefnd getur tekið ákvörðun um að svipta hvern þann, sem hlotið hefur orðuna en síðar gerst sekur um misferli rétti til að bera hana.