Willum Þór: Er úthvíldur og gæti sett á æfingartörn út alla vikuna

„Þetta gerðist mjög hratt í gær og ég er bara mjög spenntur að takast á við þetta verkefni. Það er svo margt sem styður það að þetta sé spennandi því þetta lið er búið að vera mjög sterkt síðustu ár og Kristján Guðmundsson getur gengið stoltur frá sínu verki," segir Willum Þór Þórsson sem verður formlega kynntur sem nýr þjálfari Keflavíkur á morgun.

Willum Þór skrifar undir tveggja ára samning við Keflvíkinga og getur ekki beðið eftir því að hefjast handa.

„Ég er úthvíldur núna og gæti alveg sett á æfingartörn út alla vikuna en ætli leikmenn og aðstandendur Keflavíkurliðsins þurfi ekki smá hvíld. Ég er byrjaður að teikna þetta aðeins upp en ég fer til Keflavíkur á morgun og mun þá hitta leikmenn og stjórnarmenn hjá félaginu og við munum leggja á ráðin," segir Willum Þór í viðtali við Vísi.

Nánara viðtal birtist við Willum Þór í Fréttablaðinu á morgun.