Fyrrverandi forseti Frakklands fyrir dóm

Franskur rannsóknardómari hefur skipað Jacques Chirac fyrrverandi forseta Frakklands að mæta fyrir dóm til að svara ásökunum um misnotkun á almannafé meðan hann á sínum tíma var borgarstjóri Parísar.

Chirac er sakaður um að hafa haft flokksbræður sína og starfsmenn flokksins á launaskrá borgarinnar, þótt þeir kæmu ekkert nálægt málefnum hennar.

Mál þetta hefur verið rekið í mörg ár. Þegar árið 1999 taldi réttvísin sig hafa sannanir fyrir því að Chirac hefði vitað af þessu svindli.

Forsetinn fyrrverandi kvaðst í dag reiðubúinn að mæta fyrir dóm, enda ætti hann auðvelt með að sanna sakleysi sitt.

Þetta er í fyrsta skipti í sögu Frakklands sem fyrrverandi forseti er dreginn fyrir dóm.