Brot af framkvæmdafénu fer til höfuðborgarsvæðisins

Aðeins 2-3% af framkvæmdafé Vegagerðarinnar í ár mun fara til höfuðborgarsvæðisins, eftir nýjasta niðurskurð ríkisstjórnarinnar, þrátt fyrir að 70% af tekjum ríkisins af umferð komi frá þessu þéttbýlasta svæði landsins.

Þetta kemur fram í bréfi sem Samtök um betri byggð hafa sent 34 alþingismönnum höfuðborgarsvæðisins og 70 sveitarstjórnarmönnum á svæðinu.

Betri byggð bendir á að af 19 milljarða króna framkvæmdafé Vegagerðarinnar muni aðeins 500 milljónir fara í höfuðborgarsvæðið. Framlög ríkisins til stofnbrautaframkvæmda á höfuðborgarsvæðinu hafi að meðaltali numið um 25% af heildarfjárveitingu til vegagerðar á landinu öllu síðastliðin 10 ár þótt 70% af tekjunum hafi komið frá svæðinu.

Betri byggð segir að kjörnir fulltrúar kjósenda á höfuðborgarsvæðinu hafi ekki á liðnum árum beitt sér gegn þessu óréttlæti og nú þegar steininn taki úr hafi enginn af sveitarstjórnarmönnum né þingmönnum svæðisins mómælt þessu óréttlæti opinberlega, hvorki við Alþingi né ríkisstjórn.