Seldi bíl en hirti peninginn

Maður hefur verið ákærður fyrir að draga sér söluandvirði bíls sem hann var að selja fyrir annan mann og jafnframt skrá bíl sem kom upp í söluvirði hins bílsins á sitt eigið nafn.

Fjárdrátturinn átti sér stað á síðari hluta ársins 2002 en þá fékk ákærði umboð frá eiganda bifreiðarinnar til þess að selja bílinn. Fyrir bílinn fengust tvær milljónir króna. Maðurinn fékk bíl upp í söluandvirði fyrri bifreiðarinnar sem hann skráði á sitt nafn. Sömu bifreið veðsetti hann fyrir rúmar 600 þúsund krónur og seldi síðar sömu bifreið á 1.400.000 krónur.

Mál á hendur manninum var þingfest í héraðsdómi Reykjavíkur í morgun. Eigandi bílsins fer fram á að ákærði greiði honum tæpar sex milljónir króna vegna þess tjóns sem hann varð fyrir vegna málsins en ákæruvaldið fer fram á að ákærði verði dæmdur til refsingar og greiðslu alls sakarkostnaðar.