Níðingurinn sem misnotaði dóttur sína stóðst foreldramat

Karlmaðurinn sem dæmdur var í tveggja ára fangelsi á mánudaginn fyrir að misnota dóttur sína ítrekað frá árunum 2006 til nóvember 2008 stóðst foreldrahæfnismat árið 2007. Félagsmálayfirvöld í Reykjanesbæ hættu þá við að krefjast þess að hann yrði sviptur forræði. Þetta kom fram í kvöldfréttum Ríkissjónvarpsins.

Foreldrar stúlkunnar eru báðir öryrkjar. Faðirinn mun ekki hafa haft samfarir við stúlkuna sem verður þriggja ára í maí en brotið gegn henni á ýmsan annan hátt. Fram kemur í dómnum að maðurinn eigi við mjög alvarlega persónuleikaröskun að stríða en sé þó sakhæfur.

Samkvæmt frétt Rúv ætluðu barnaverndaryfirvöld í Reykjanesbæ að krefjast þess í febrúar 2007 að foreldrar stúlkunnar yrði sviptir forræði og voru að undirbúa málsókn. Dómstólar fóru fram á foreldrahæfnismat en á þeim tíma fór faðirinn með forræðið yfir stúlkunni og mat sálfræðingur hann hæfan.

Í kjölfarið ákváðu barnaverndaryfirvöld Reykjanesbæjar að hætta við að krefjast forræðissviptingar.

Stúlkan þykir hafa orðið fyrir miklum sálrænum erfiðleikum af völdum brotanna. Forstöðumaður Barnahúss tók stúlkuna í meðferð og sagðist fyrir dóma ,,aldrei áður hafa séð svona sterka kynferðislega hegðun hjá svona ungu barni“. Hún biðji fólk ítrekað um að stunda með sér kynferðislegt athæfi, snerti kynfæri sín í tíma og ótíma, klæði sig óumbeðin úr fötum og líki eftir kynmökum með tuskudýrum.