Bóndinn sem hafnaði veginum fær 35 milljóna bætur

Þetta snýst um þrjátíu kílómetra veg í stað Öxarfjarðarheiðar til að koma byggðum beggja megin Melrakkasléttu í betra vegarsamband um Hólaheiði og Hófaskarð en þaðan er magnað útsýni yfir Kollavík og til Langaness. Kostnaður slagar hátt í milljarð króna en það er hins vegar ekki unnt að opna veginn þar sem Vegagerðin hefur ekki fengið leyfi til að leggja síðasta kaflann. Þarna endar vegurinn skyndilega og það vantar bara 1700 metra yfir þennan móa, um land bóndans á Brekku, Boga Ingimundarsonar, sem stóð harður á móti.

Verktakinn Héraðsverk er að pakka saman og þar segjast menn gáttaðir. Gísli Guðnason verkstjóri segir menn orðlausa. Þetta sé sorglegt, miðað við það sem er búið og þennan litla spotta sem eftir er, að geta ekki opnað þetta.

Íbúar nærliggjandi byggða eru óhressir. Sveitarstjóri Langanesbyggðar, Gunnólfur Lárusson, segir þetta skandal, að ekki sé unnt að opna þennan fína veg þegar aðeins 1.500 metrar séu eftir.

Margir vilja skella skuldinni á bóndann á Brekku en sjálfur vill Bogi ekki ræða málið, segir dóm Hæstaréttar tala sínu máli, en þar var hafnað kröfu Vegagerðarinnar um að taka land hans eignarnámi. Vegagerðin hefur í framhaldinu neyðst til að greiða honum 35 milljónir króna í bætur fyrir rask, efnistöku og fyrir land sem hann á ofar í heiðinni, sem vegurinn var lagður um. Gula línan sýnir hvernig síðasti kaflinn átti að liggja um land Brekku en Hæstiréttur taldi eignarnámið ekki nauðsynlegt enda hefði Vegagerðin tilgreint annan valkost, bláu línuna, um ríkisjörðina Katastaði.

Í millitíðinni bættist hins vegar enn eitt klúðrið við; landbúnaðarráðuneytið seldi Katastaði, og nýi eigandinn, Sigurður Árnason, sagði líka þvert nei, vegurinn færi ekki í gegn hjá sér. Það hefði að hans mati eyðilagt jörðina.

En hvað finnst honum um afstöðu nágranna síns, Brekkubóndans? Einstrengingsleg, svarar Sigurður. Þar sé ekki verið að hafa samfélagið að leiðarljósi, né nágrannana.

Sveitarstjórnarfulltrúinn Jón Grímsson segir að menn séu daprir yfir því hvernig farið sé með opinbert fé. Hann hefði aldrei trúað því að hægt væri að koma hlutunum í svona stöðu.