Steingrímur: Samkomulagið hluti af herkostnaðinum

„Þetta er hluti af herkostnaðinum sem við sitjum uppi með," sagði Steingrímur J. Sigfússon, fjármálaráðherra, um ríkisábyrgð vegna Icesave-samkomulagsins á Alþingi í dag. Ráðherrann sagði skítt að Íslendingar sitji uppi með afleiðingar andvaraleysis stjórnvalda undanfarinna ára. Þá fullyrti Steingrímur að milljarðarnir sem fengust fyrir Landsbankann þegar hann var einkavæddur á sínum tími hafi verið þeir dýrustu í sögu Íslands.

Steingrímur rakti forsögu málsins þegar hann mælti fyrir frumvarpi um ríkisábyrgð á lántöku tryggingarsjóðs innstæðueigenda og fjárfesta vegna Icesave. Búist er við umræður um frumvarpið fram eftir kvöldi en í hádeginu voru 28 þingmenn á mælendaskrá.

Steingrímur sagði að það hafi verið niðurstaða ríkisstjórnar Sjálfstæðisflokks og Samfylkingar að samningaleiðin við bresk og hollensk stjórnvöld hafi verið eina leiðin sem væri í boði. Litlu hefði munað að gengið væri frá samkomulaginu í janúar sem hafi ekki verið eins gott og það sem undirritað var nýverið. Þá benti Steingrímur á að 5. desember hafi Alþingi falið framkvæmdavaldinu að leiða málið til lykta. Hann kvaðst sannfærður um samkomulagið væri gott fyrir þjóðina.