Gefur hvalpiparsteikur á bjórdaginn

„Já, þannig er að 1. mars. á sunnudag, á bjórdag, á tuttugu ára afmælisdegi staðarins býð ég öllum landsmönnum upp á hvalpiparsteik. Opið hjá mér frá klukkan fjögur og fram eftir," segir Úlfar Eysteinsson vert á Þremur Frökkum í Þingholtunum.

Úlfar er einn þeirra sem fagnar mjög þeirri heimild Einars K. Guðfinnssonar, sem hann gaf út korteri áður en hann hætti sem sjávarútvegsráðherra, til veiða á 150 langreyðum á ári til ársins 2013 sem og veiðum á 100-150 hrefnum á ári. Málið olli miklum deilum, fjölmargir lýstu ánægju sinni með ákvörðun Einars, en aðrir fordæmdu hana - einkum þeir sem starfa í ferðamálabransanum. En Úlfar blæs á þær raddir. „Ég er mjög ánægður með að menn séu farnir að veiða hval aftur. Mikil ósköp," segir Úlfar. Hann bendir á að hrefnukvótinn í fyrra hafi verið með þeim ósköpum að hann var farinn að leggja drög að því að kaupa kjöt frá Noregi.

„Ég var að nota tíu prósent af kvótanum! Eitt lítið veitingahús með 44 sæti. Fjörutíu dýr veidd og ég nota fjögur. Já, blessaður. Menn gleypa þetta í sig. Útlendingarnir koma úr hvalaskoðun og svo hingað til að bragða hval."- jbg