Lögreglumenn fundu 7 kíló af kannabisefnum

Það voru alls sjö kíló af kannabisefnum sem lögreglan fann í íbúð í Engihjallanum í gærkvöld. Um var að ræða 4 kílógrömm af marijúana og 3 kílógrömm af hassi. Fréttastofa sagði frá málinu fyrr í morgun, en þá hafði magnið ekki fengist staðfest.

Í tilkynningu frá lögreglunni kemur fram að einnig hafi verið lagt hald á peninga sem grunur leikur á að séu tilkomnir vegna fíkniefnasölu. Tveir karlar á þrítugsaldri voru handteknir í þágu rannsóknarinnar.

Fyrrnefnd aðgerð er liður í að hamla gegn sölu og dreifingu fíkniefna en sem fyrr minnir lögreglan á fíkniefnasímann 800-5005. Í hann má hringja nafnlaust til að koma á framfæri upplýsingum um fíkniefnamál. Fíkniefnasíminn er samvinnuverkefni lögreglu og tollyfirvalda og er liður í baráttunni við fíkniefnavandann.