Hvatt til mótmæla á fundi Leikskólaráðs

Leikskólaráð Reykjavíkurborgar tekur ákvörðun um það eftir hádegi hvort leikskólagjöld verða hækkuð hjá þeim börnum sem eru lengur en átta tíma á dag í skólanum. Tveggja barna móðir hvetur foreldra til að mæta og mótmæla við upphaf fundarins.

Tillagan þess efnis verður lögð fram á fundi leikskólaráðs sem hefst klukkan tvö en það er meirihlutinn í borgarstjórn sem stendur á bak við hana. Gert er ráð fyrir að leikskólagjöldin hækki mest hjá foreldrum sem eru í sambúð eða í hjónabandi.

Þorbjörg Helga Vigfúsdóttir, formaður leikskólaráðs, segir hækkunina mismunandi eftir stétt og stöðu foreldra. Að jafnaði sé hækkunin 30-50% fyrir fyrsta hálftímann en 40-100% eftir það. Þannig hækkar gjaldið um tvö þúsund krónur hjónum sem eru með barn í vistun í átta og hálfan tíma. Þá gerir tillagan jafnframt ráð fyrir að framlag borgarinnar til sjálfstætt starfandi leikskóla og dagmæðra lækki. Þorbjörg segir algengast að foreldrar séu með börn sín skráð í vistun í átta og hálfan tíma en kannanir sýni að þau dvelji að meðaltali rúma sjö tíma á dag á leikskólanum.

Sigrún Erla Sigurðardóttir er tveggja barna móðir. Hún er með barn á leikskóla í borginni. Hún biður fólk að taka þátt í mótmælastöðu vegna fyrirhugaðra hækkana. Mótmælastaðan hefst við Miðbæjarskóla klukkan hálf tvö en þar fer fundur leikskólaráðs fram.