Logi umvafinn kvenfólki

Auðunn Blöndal bauð til veglegrar veislu á fimmtudagskvöldið til að fagna fyrsta þætti Atvinnumannanna okkar. Logi Geirsson, stjarna fyrsta þáttarins, var að sjálfsögðu á svæðinu.„Hann er bara stofnun eða eins og strákarnir í landsliðinu segja, Logi er bara spaði,“ segir Guðjón Guðmundsson, íþróttafréttamaður Stöðvar 2 og fyrrum aðstoðarþjálfari íslenska landsliðsins.

Hann var einn fjölmargra gesta Auðuns Blöndal á Steak & Play þegar fyrsti þáttur af Atvinnumönnunum okkar var frumsýndur á fimmtudagskvöld. Stjarna þáttarins var enginn annar en Logi Geirsson og var gerður góður rómur að þættinum enda þykir Logi einstaklega skrautlegur og skemmtilegur persónuleiki. „Þetta er einhver besti og skemmtilegasti íþróttaþáttur sem ég hef séð og Logi er bara náttúrlega eins og hann er, algjört séní,“ bætir Guðjón við.