Björgunarsveitamenn leita Aldísar á morgun

Björgunarsveitir Slysavarnafélagsins Landsbjargar munu leita að Aldísi Westergren, sem saknað hefur verið síðan 24. febrúar, á morgun. Leitað verður á svæði í kringum heimili hinnar týndu, þar með talið svæðið í kringum Reynisvatn.

Í tilkynningu frá Slysvarnarfélaginu Landsbjörgu segir að gert sé ráð fyrir að um 250 björgunarsveitarmenn af höfuðborgarsvæðinu, Vesturlandi, Suðurlandi og Suðurnesjum komi að leitinni, sem hefst upp úr klukkan átta í fyrramálið.

Þann 9. mars síðastliðinn var tilkynnt að leit að Aldísi Westergren væri formlega hætt en rannsóknarlögreglan myndi rannsaka málið sem mannshvarf.