Mótmælendur aftur farnir á stjá í Íran

 Íranskar öryggissveitir tóku hart á þúsundum mótmælenda fyrir utan Háskólann í Teheran í gær. Lögreglan beitti bæði táragasi og bareflum á mannfjöldann, sem hrópaði slagorð gegn Mahmoud Ahmadinedjad, forseta landsins.

Mótmælin í gær voru fjölmennari en sést hafa mánuðum saman, en í beinu framhaldi af fjöldamótmælum sem hófust í kjölfar forsetakosninganna í sumar.

Háskólastúdentar í Teheran hafa farið í fararbroddi mótmælanna frá upphafi. Þeir reyndu í gær að glæða mótmælin nýju lífi með því að efna til mótmælafunda víðs vegar um landið.

Þúsundir almennra lögreglumanna, sérsveitarmanna og hermanna fylktust að Háskólanum í Teheran í gær til að koma í veg fyrir að mótmælin breiddust út.

Há girðing umhverfis skólalóðina var þakin borðum og spjöldum með slagorðum ættuðum frá Ali Khameini æðstaklerki. Þar með var tryggt að utanaðkomandi gætu ekki séð hvað var að gerast fyrir innan.

Þá var farsímasamband truflað á svæði í kringum háskólann. Ströng varðgæsla var við alla innganga og skilríkja krafist.

Fyrir innan tóku þúsundir háskólanema þátt í mótmælafundum, margir með klúta fyrir andliti. Sumir voru með græn armbönd eða með grænar blöðrur, en grænn er litur stjórnarandstöðuhreyfingarinnar, stuðningsmanna Mir Hossein Moussavi, mótframbjóðanda Ahmadinejads í forsetakosningunum í júní.

Lýðræðishreyfingin, sem náði miklu flugi í kjölfar kosninganna, hefur ekki fallist á niðurstöður þeirra. Hún hefur barist fyrir umbótum í landinu og krefst þess að Ahmadinejad láti af völdum. Hreyfingin hefur þó látið lítið fyrir sér fara eftir að mótmælin í sumar voru barin niður af fullri hörku.

Óttast var í gær að átök myndu magnast þegar liði á daginn.

„Það er uggur í fólki um að hér komi til ofbeldis og skotið verði af byssum. Ég hrópa slagorð og mótmæli en reyni að vekja ekkert tilefni til átaka við öryggissveitirnar,“ sagði einn háskólaneminn. „Við höfum áhyggjur.“

gudsteinn@frettabladid.is